Totoy sinagip ng pusa sa asong ulol

NAGING trending sa internet ang dramatic footage ng matapang na pusa habang sinasagip ang isang batang lalaki mula sa atake ng asong ulol.

Bunsod ng insidente, marami ang nagsabi na ang mga pusa ay maaari ring maging “man’s best friend” bukod sa aso.

Ini-post ng ABC affiliate ang video, na mapapanood ang bata habang lulan ng maliit na bisekleta sa isang lugar sa Bakersfield, California nang biglang sumulpot ang aso at sinakmal ang paslit sa binti saka kinaladkad.

Sa kabutihang palad, namataan ng pusa ang insidente, agad niyang sinugod ang asong ulol na mabilis na tumakbo palayo.

Ang video na simpleng may pamagat na “My cat saved my son,” ay sinasabing maaaring edited mula sa home security footage, ng ina ng bata.

Ang bata ay nasa maayos nang kalagayan makaraan malapatan ng lunas sa pagamutan.

Samantala, ayon sa ulat ng TMZ, ang aso sa nasabing video ay maaaring patayin na lamang.

Makaraan kunin ng animal control, nagdesisyon na patayin na lamang ang aso dahil mas lalo itong naging agresibo.

Ito ay upang hindi na makapanakit pa ng iba ang hayop. (www.thewire.com)