Jobless na manugang todas sa biyenan

PATAY ang 29-anyos  mister nang barilin ng kanyang biyenan habang nagtatalo sa kawalan ng trabaho sa Caloocan City kamakalawa ng gabi.

Dead on arrival sa Manila Central University (MCU) hospital ang biktimang si John Paul Hernandez, 29, walang trabaho, ng 92-C 10th  St., 11th Avenue, Brgy, 93 sanhi ng tama ng bala ng kalibre .38 sa iba’t ibang parte ng katawan.

Kusang-loob sumuko kay Barangay Chairman Sonny Bonifacio ang suspek na si Wilfredo Garcia,53-anyos ng 270 Alley 8, 10th St., dahil sa kasong murder.

Sa ulat ni PO3 Michael Viray, may hawak ng kaso, dakong 10:15 p.m. nang maganap ang insidente  malapit sa bahay ng suspek.

Nabatid, unang nagka-alitan ang magbiyenan dahil sa kawalan ng trabaho ng biktima at lagi pang lasing at hindi nakatutulong sa kanyang pamilya.

Kamakalawa ng gabi, sumugod ang biktima sa bahay ng kanyang biyenan at nagagalit dahil sa pakikialam ng suspek sa kanilang buhay.

Dito na kinuha ng suspek ang kalibre .38 at pinagbabaril ang kanyang manugang na agad namatay noon din. (r. sales)