Sanggol, paslit tostado sa sunog

DAGUPAN CITY – Patay ang magkapatid na sanggol at paslit nang masunog ang kanilang bahay sa bayan ng Villasis sa Pangasinan.

Ayon kay PO3 Gilbert Paganit ng Villasis-Philippine National Police, magkahawak pa ang kamay ng magka-patid na sina Anthony Canibas, Jr., 4-anyos, at Mark Laurence Canibas, isang taon gulang, nang matagpuan ng mga miyembro ng Bureu of Fire Protection (BFP) – Villasis sa hinihigaan nilang papag.

Sinasabing iniwan ng mag-live-in partner na sina Anthony Canibas at Mary Grace Tabuno ang dalawa nilang anak habang natutulog para manood ng pagdiriwang ng pista ng kanilang barangay.

Ngunit paglipas lamang ng ilang saglit ay tinupok ng apoy ang bahay na agad naabo dahil gawa lamang sa light materials.

Sinasabing posibleng natabig ng isa sa mga bata ang lamparang nasa gilid ng kama na iniwan ng kanilang mga magulang.

Nadamay rin sa sunog ang tatlo pang kabahayan.

(BETH JULIAN)