Bisita sa kasalan utas sa boga ni tserman

SAN FERNANDO CITY, La Union – Pinaghahanap ng pulisya ang punong barangay na pumaslang sa isang lalaki habang nasa kasagsagan ng kasayahan ng kasalan sa Brgy. Baracbac Este sa bayan ng Balaoan, La Union.

Ang suspek ay kinilalang si Barangay Baracbac Este Chairman Elmer Ordanza.

Ayon sa Balaoan Municipal Police Station, nagkaroon ng mainitang pagtatalo ang suspek at ang biktimang si Arnold Navalta, 34, habang sila ay nasa nabanggit na pagdiriwang kamakalawa ng gabi.

Bumunot ng baril ang kapitan at pinagbabaril ang biktima.

Agad tumakas ang suspek makaraan ang krimen na ikinabulabog ng mga dumalo sa kasalan.

Naisugod sa pagamutan ang biktima ngunit binawian ng buhay dahil sa mga sugat sa iba’t ibang bahagi ng kanyang katawan.

(LANI CUNANAN)