Softdrinks dealer tigok sa tandem

PATAY ang softdrinks dealer nang sabayan at barilin ng isa sa dalawang hindi nakilalang suspek na sakay ng motorsiklo habang lulan ng tricycle upang mag-deli-ver ng kanyang paninda sa Caloocan City kamakalawa ng umaga .

Hindi na umabot nang buhay sa pagamutan ang biktimang si Wilfredo Junio, 33, residente ng Phase 4B, Brgy. 176, Bagong Silang ng nasabing lungsod, sanhi ng mga tama ng bala ng kalibre .45 sa ulo.

Habang pinaghahanap ng mga awtoridad ang dalawang suspek na mabilis na tumakas sakay ng hindi naplakahang motorsiklo.

Sa ulat ng pulisya, dakong10 a.m. nang maganap ang insidente sa Phase 1 ng nasabing barangay.

Sa salaysay ng tricycle driver na si Roxane Gabon, pasahero niya ang biktima at may karga silang softdrinks na ihahatid sa isang tinda-han sa nasabing lugar, nang sumulpot ang motorsiklong sakay ang mga suspek na parehong nakasuot ng helmet.

Dinikitan sila ng motorsiklo at walang sabi-sabing pinaputukan ang kanyang pasahero. Laking pasasalamat ni Gabon dahil hindi siya tinamaan.

Patuloy na inaalam ng mga awtoridad ang motibo sa insidente.

(ROMMEL SALES)