HATAW! D'yaryo ng Bayan hatawtabloid.com
INARESTO at ikinulong ang 33-anyos messenger nang mabuko ang pamboboso at ini-video pa ang dalagang kapit-kuwarto, habang naliligo sa loob ng banyo, sa Taguig city, kamakalawa ng gabi.
Nabisto ng 28-anyos dalaga, na itinago sa pangalang Marlie, ang paninilip ng suspek na kinilalang si Elmer Lapid, nang kumislap ang cellphone niyang gamit sa pagkuha ng larawan habang naliligo ang biktima.
Sa pahayag ng dalaga kay PO2 Sarah Valderama ng Women and Children’s Protection Desk (WCPD) ng Taguig police, dakong 9:00 ng gabi nang maganap ang insidente sa loob ng banyo ng inuupahang boarding house sa Barangay Western Bicutan, ng lungsod.
Agad humingi ng tulong sa mga pulis ang dalaga at nang komprontahin ang suspek, napilitang ilabas ni Lapid ang kanyang cellphone na naglalaman ng video at larawan ng dalaga habang naliligo.
Nakapiit na sa detention cell ng Taguig PNP si Lapid at nahaharap sa kasong paglabag sa Republic Act 9995 o Anti-Photo and Video Voyeurism Act.(JAJA GARCIA)
