Ininsultong bingot bunso pinatay ni kuya

BUTUAN CITY – Patay ang isang lalaki matapos hatawin ng tubo sa ulo ng kanyang nakatatandang kapatid kahapon ng madaling-araw.

Ayon kay Inspector Victor Preciouso ng Butuan City Police Station, nangyari ang insidente dakong 12:45 a.m. kahapon sa Purok 3, Brgy. Salvacion, Butuan City.

Base sa imbestigasyon, nag-inoman ang magkapatid at bunsod ng kalasingan, ininsulto ng biktimang si Romy Panilaga, 30, ang nakakatandang kapatid na si Ramil Panilaga, 39, na may bingot na labi.

Umuwi ang suspek upang makaiwas sa gulo ngunit sinundan siya ng biktima na may dalang kutsilyo.

Aminado ang suspek na si Ramil sa ginawang krimen ngunit giit niya, nagawa lamang niya ito sa takot na masaksak ng kapatid nang makitang may dalang kutsilyo.

Kinompirma rin ni Marissa Panilaga, asawa ng biktima, ang naturang testimonya ng suspek.

Ayon sa ginang, umuwi sa kanilang bahay ang mister at kumain bago humingi ng kutsilyo at nagtungo sa bahay ng kapatid.

Sinaway ng ginang ang biktima at iginiit na matulog na’t huwag nang maghanap ng gulo ngunit hindi nakinig.

Dagdag pa ginang, pinagbantaan siya ng asawa na sasaktan nang sundan niya kaya’t umuwi na lamang siya sa takot na masaksak.

Sa ngayon, nasa kustodiya ng pulisya ang suspek habang inihahanda ang kaso laban sa kanya.