11-anyos ‘fb hacker’ todas sa 46 saksak ng ‘igan (Account pinakialaman)

PATAY ang 11-anyos totoy makaraang 46 beses saksakin ng kanyang kaibigan bunsod ng alitan sa Facebook nitong nakaraang Linggo.

Kinilala ang biktimang si Michael Jericho “MJ” Surio, grade 5 pupil, residente ng Brgy. Barihan sa Malolos, Bulacan.

Si Surio ay huling nakitang buhay nitong Linggo kasama ang 16-anyos suspek na kanyang kaibigan.

Napag-alaman, nag-alala ang mga magulang ni Surio nang hindi na umuwi ang biktima ng gabing iyon.

Pagkaraan ay natagpuan ang bangkay ng biktima sa loob ng isang itinatayong bahay.

Ang biktima ay natuklasang may 46 saksak sa iba’t ibang bahagi ng kanyang katawan.

Naniniwala ang mga imbestigador, pinatay ng suspek si Surio bunsod ng matinding galit matapos i-hack ng biktima ang Facebook account ng salarin.

Ang suspek ay unang ipiniit sa Malolos City Police Station ngunit inilipat na sa kustodiya ng Department of Social Welfare and Development dahil siya ay menor de edad.

HATAW News Team