Condom na gamit ‘di naipakita ng gro kustomer inutas ni mister

GENERAL SANTOS CITY – Napatay ng live-in partner ng isang babaeng guest relations officer (GRO) ang kanyang kustomer nang hindi maipakita ang condom na ginamit nila sa pagtatalik.

Hindi na umabot nang buhay sa pagamutan ang biktimang si Dennis Uctoso, 49, tubong Silay, Negros Occidental ngunit nangungupahan sa Brgy. Tambler, Gen. Santos City dahil sa sugat sa dibdib.

Una rito, nag-check-in sa lodging house ang biktima kasama ang GRO na si Inday Taburada, live-in partner ng suspek na si alyas Junjun.

Pasado 10 p.m. nang lumabas ang babae at agad hinanap ng suspek sa kanya ang ginamit na condom.

Ngunit walang naibigay ang babae na nagresulta sa pag-aaway ng dalawa.

Hindi na nakialam ang biktima sa away ng mag-live-in partner kaya’t lumabas na siya ng lodging house.

Ngunit sinundan siya ng suspek at sinaksak sa dibdib.

Ayon sa pulisya, kilala nila ang nasabing GRO maging ang kinakasama na selosong lalaki.

Kapwa hindi pa mahagilap ang dalawa matapos ang insidente.

(HNT)