Magkano ang napupunta sa mga beneficiary? (Sa milyon-milyong kinita ng MMFF)

MINSAN nakatatawa ang mga gross report ng mga pelikula kung panahon ng film festival, kagaya rin ng kung nagkakasabay-sabay sila ng playdate, payabangan. Pataasan ng sinasabing kita kahit na hindi. Lalo na nga kung festival, hindi masyadong naghahabulan sa tax dahil ibinibigay naman iyan “supposed to be” sa beneficiaries ng festival.

Paanong hindi ka matatawa, ang claim ng MMDA, ang festival ay kumita na ng P587-M. Pero kasabay niyon, sinasabi ni Kris Aquino sa kanyang social networking account na kumita na ang kanilang pelikula nang mahigit na P300-M. Realistic din naman ang sinasabi ng Star Cinema na ang pelikula nilangGirl, Boy, Bakla, Tomboy ay kumita na ng P200-M, lalo na nga’t matapos na makakuha iyon ng magagandang reviews at manalong best actress si Maricel Soriano.

Lalo namang hindi mo masasabing imposible na ang pelikula ni Daniel Padilla ay kumita na nga ng P100-M.

Pero kung ganoon ang kinita ng tatlong pelikula, at ganoon ang sinasabi ng MMDA, magkano na ang kinita ng limang iba pang pelikula? Bente singko sentimos?

Somewhere may padding na nangyayari riyan, iyon na nga lang titingnan natin kung sino ba ang mas credible riyan sa mga gumagawa ng claims na ganyan. Tingnan na lang natin kung sino ang mas may kapani-paniwalang claims. Kung ganyan din ang kinita ng mga pelikula sa festival, magkano naman kaya ang mapupunta sa mga maliliit na manggagawa ng industriya ng pelikulang Filipino na siyang sinasabing primary beneficiary ng festival? Magkano ang ibibigay nila saMowelfund? Magkano kaya ang makukuha ng social fund ni PNoy diyan, kasi may parte rin siya riyan eh. Iyon ang tanong ngayon.

(Ed de Leon)