Dozier balik-Alaska

KINOMPIRMA ng board governor ng Alaska na si Joaqui Trillo na babalik si Robert Dozier upang tulungan ang Aces na depensahan ang kanilang korona sa PBA Commissioner’s Cup na magsisimula sa Marso.

Katunayan, binanggit ni Trillo na sa unang linggo ng Pebrero darating si Dozier sa bansa upang magsimulang mag-ensayo sa Aces.

Dinala ni Dozier ang Alaska sa kampeonato ng Commissioner’s Cup noong isang taon nang winalis ng Aces ang Barangay Ginebra San Miguel sa finals sa harap ng 23,361 na kataong nanood sa Smart Araneta Coliseum.

Samantala, napaiyak si Trillo sa tribute na ibinigay ng Alaska at ng PBA sa kanya pagkatapos na magretiro siya bilang team manager ng Aces.

“I’m gonna miss winning games. I’m gonna miss not seeing friends, other players, the commissioner’s office. For 25 years I’ve gotten so close to a lot of people,” wika ni Trillo tungkol sa kanyang pagiging team manager mula 1990 hanggang noong isang taon.

(James Ty III)