Fajardo buhay ng Boosters

MATAPOS ang pitong sunud-sunod na panalo, abay nakalasap ng back-to-back na kabiguan ang Petron Blaze upang bumagsak sa ikalawang puwesto.

Noong Linggo ay napatid ang winning streak ng Boosters nang sila’y maungusan ng Rain Or Shine, 99-95.

At noong araw ng Pasko ay muling yumuko ang Boosters sa Barangay Ginebra San Miguel, 99-83.

Malaking bagay para sa Petron ang pagkakaroon ng injury ng higanteng si June Mar Fajardo na hindi nakapaglaro kontra sa Gin Kings. Aba’y siya lang ang absent pero dinamdam nang husto ng Boosters ang kanyang pagkawala.

Ito’y taliwas sa nangyari sa Petron Blaze sa unang bahagi ng torneo nong hindi nakapaglaro sina Alex Cabagnot, Chris Ross, Yousef Taha, Ronald Tubid at maging si Chris Lutz.

Sa kabila ng kanilang pagkawala ay nagwagi ang Boosters at nagkaroon nga ng winning streak.

Pero ngayong iisang manlalaro ang wala, aba’y tinambakan sila ng kalaban.

Ganito katindi ang halaga ni Fajardo. At para bang walang puwedeng pumalit sa kanya sa line-up ng Bosters.

Maraming dumadalangin na makabalik na kaagad sa active duty si Fajardo dahil baka magtuluy-tuloy ang pagsadsad ng Boosters. Masama iyon.

Kung sabagay, parang nakapagpondo na ang Boosters. Ang mahalaga naman ay nasa upper half sila ng  standings hanggang sa pagtatapos ng elims para sa magandang insentibo sa quarterfinals. Iwasan lang nilang bumagsak sa ikalimang puwesto kung sakali.

At siyempre, eye opener ang back-to-back na pagkatalo. Ibig sabihin ay kailangang mag-step up ang ibang big men nila kapag wala si Fajardo.

Sabrina Pascua