HATAW! D'yaryo ng Bayan hatawtabloid.com
YAKAP pa ng ina ang bunsong anak nang magkakasamang nalitson ang apat na miyembro ng pamilya matapos makulong sa loob ng banyo sa nasusunog nilang bahay kamakalawa ng gabi, sa Mandaluyong City.
Kinilala ni Bureau of Fire Marshal Inspector Nahuma Tarroza, ang mag-iinang namatay na sina Andrei Calunsod, 4-anyos; Yui, 2; Chelsea, isang taon gulang at ang kanilang nanay, si Blitz Santos, 44.
Dakong 8:20 ng gabi nang magsimula ang sunog sa bahay ng mga biktima sa Barangay Addition Hills, San Roque, Ilaya, ng lungsod.
Unang natagpuan ang bangkay ni Blitz Santos, na yakap pa ang bunsong anak sa loob ng banyo.
Mabilis natupok ang tahanan ng pamilya Calunsod dahil gawa ito sa light materials.
Lumalabas na posible umanonng nataranta ang ina ng mga bata dahil sa biglang pagkalat ng apoy kaya’t imbes lumabas mula sa nasusunog na bahay, tumakbo sa banyo kasama ang tatlong anak.
Hindi na nakalabas mula sa banyo ang mag-iina dahil sa grills na nakakabit sa bintana ng banyo.
Patuloy pang ina-alam ang pinagmulan ng sunog habang tinatayang aabot sa P500,000 halaga ng ari-arian ang naabo na umabot sa ikalawang alarma.
ni ED MORENO
Sa Negros Occidental
15-ANYOS NASUNOG DIN
Isang 15-anyos na binatilyo ang namatay sa nasunog na tindahan ng paputok sa Public Plaza sa Escalante, Negros Occidental, Linggo.
Kinilala ang biktimang si Jomar Palo, habang nalapnos naman ang ilang parte ng katawan ni Rodrigo Bayotas, 35-anyos, na kasama niyang natutulog sa tindahan ng paputok ni Wilfren Bayotas, nang maganap ang insidente.
Ayon sa mga imbestigador, posibleng ang mga lalaking nakitang tumatakbo mula sa tindahan ng paputok ang may kagagawan ng sunog.
Dalawang kalapit na tindahan ang nadamay sa nasabing sunog.
P5-M ARI-ARIAN NILAMON NG APOY
TINATAYANG mahigit sa P5 milyon halaga ng ari-arian ang nilamon ng apoy sa naganap na sunog sa tatlong malalaking bodega kahapon ng madaling araw, sa Parañaque City.
Isinusulat ang balitang ito, patuloy pang inaapula ang apoy na tumupok sa malaking bodegang pag-aari ng isang Willy Tieng sa Nelbros St., Barrio Ibayo, Brgy. Sto. Nino, na umabot ang alarma sa Task Force Bravo.
Sa inisyal na ulat ni SFO1 Vicente Aurellano ng Parañaque City Bureau of Fire Protection, dakong 1:10 ng madaling araw nang magsimula ang sunog sa gitnang bahagi ng bodega ng Maldives Trading sa nasabing siyudad.
Dahil sa pagsiklab ng apoy, nadamay ang katabing KLG Warehouse na naglalaman ng mga kitchen wares, pati na ang gusali ng CEVA Logistics.
Sa ulat, hindi pa batid kung may namatay o nasugatan sa naturang insidente at patuloy pang inaalam ng mga awtoridad kung ano ang sanhi ng sunog.
(JAJA GARCIA)
