Sibakan sa DepEd banta sa Pasko (Libo-libong empleyado apektado)

HINDI magiging masaya ang Pasko para sa libo-libong empleyado ng Department of Education (DepEd) na mawawalan ng trabaho bago matapos ang taon, pahayag ng Alliance of Concerned Teachers (ACT) Party-list.

Sinabi ni ACT Rep. Antonio Tinio, ang malawakang sibakan sa trabaho ay bunsod ng pag-iisyu ng panuntunan na nagpapatupad sa rationalization plan ng DepEd nitong Disyembre 3.

Sa rationalization plan, ang DepEd ay magpapatupad ng bagong sistema sa paglalagay ng staff sa sumusunod na mga tanggapan: lahat ng central office units, 16 regional office units maliban sa DepEd-ARMM, at 206 school division offices.

Bukod sa pagpapatupad ng bagong sistema, ang DepEd din ang may solong hawak ng opsyon kung pananatilihin o babawasan ang kasalukuyan nilang bilang ng mga empleyado.

Ang mga empleyado na ang items ay maaapektohan ng rationalization plan ay maaaring pumili ng pananatili sa government service o mag-avail ng retirement o separation incentives.

Bilang resulta, ang posisyon ng lahat ng personnel na masisibak ay idedeklarang “non-vital or redundant,” diin ni Tinio.

Binatikos ni Tinio ang DepEd sa aniya’y pag-railroad sa pagpapatupad ng rationalization plan na itinaon pa ngayong Kapaskuhan.

“Hindi makatutulong ang pagmamadaling ito sa karaniwang kawani lalo na’t papasok na ang Pasko’t bagong taon. Panibagong delubyo rin ito para sa mga nasalanta ng Yolanda at iba pang bagyo pati na rin ang naapektohan sa stand-off sa Zamboanga.”

HATAW News Team