4 patay, 1 sugatan sa tambang

LAOAG CITY – Tatlo ang agad binawian ng buhay habang isa ang namatay habang ginagamot sa ospital makaraang tambangan sa Brgy. Sta Cruz-B, Badoc, Ilocos Norte kamakalawa ng gabi.

Kinilala ang mga biktimang agad namatay na sina Benny Rosete, 31; Jerry Guzman; at William Acoba.

Namatay naman sa ospital si Hayamel Rosete, 11, anak ni Benny Rosete.

Nasugatan sa insidente si Mark John Rosete, pamangkin ni Benny.

Habang nakaligtas si Michelle Rosete, asawa ni Benny; Sonnymel Rosete, anak ni Benny; Rayen Jen Rosete, 3-anyos na special child at pamangkin ni Benny.

Ayon kay P/S/Insp. Leonardo Tolentino, hepe ng PNP Badoc, nangyari ang insidente 9 p.m. habang nakasakay ang mga biktima sa isang tricycle at motorsiklo.

Paakyat sila sa mataas na bahagi ng daan sa nasabing barangay nang bigla na lamang silang paputukan ng hindi nakilalang mga salarin, gamit ang isang M16.

Patuloy ang isinasagawang imbestigasyon ng PNP Badoc.