Buntis, magulang patay sa ratrat ng ex-BF

PATAY ang  anim-buwan buntis  at kanyang mga magulang nang magwala at mamaril ang ama ng sanggol sa kanyang sinapupunan, sa Navotas City kahapon ng umaga.

Dead on the spot ang mga biktimang  sina Jocelle Dinolang at mag-asawang Rosa at Cecilio Dinolang, nasa hustong gulang, mga residente ng Kalye Impiyerno, Tabing-Dagat, Brgy. San Roque.

Sa ulat,  mga tama ng bala ng kalibre .45-mm at 9-mm pistol ang ikinamatay ng mga biktima,   na malapitang binaril sa ulo at sa iba’t ibang parte ng katawan.

Pinaghahanap ang kapitbahay na suspek na kinilalang isang alyas  Gigi, na mabilis  tumakas matapos ratratin ang mga biktima.

Sa ulat ng pulisya, dakong 7:30 ng umaga nang maganap ang pamamaril sa labas ng bahay ng mga biktima.

Dumating ang suspek upang muling suyuin ang girlfriend na nabuntis niya pero binungangaan ng mag-asawa ang suspek.

Dahil umano sa labis na kahihiyan at pagka-insulto, umalis ang suspek at nang magbalik ay walang sabi-sabing niratrat ang mga biktima.

Basyo ng kalibre .45 at .9mm baril ang nakuha ng mga imbestigador sa pinangyarihan ng insidente.

ni rommel sales