HATAW! D'yaryo ng Bayan hatawtabloid.com
PAGSOSYO sa ikalawang puwesto ang pakay ng Jumbo Plastic sa salpukan nila ng Cagayan Valley sa 2013-14 PBA D-League Aspirants Cup mamayang 2 pm sa Blue Eagle Gym sa Quezon City.
Sa ikalawang laro sa ganap na 4 pm ay magkikita ang Cafe France at Zambales M-Builders.
Ang Jumbo Plastic, na hawak ni coach Stevenson Tiu, ay may 5-1 karta. Kung magwawagi ang Giants ay makakasama nila sa ikalawang puwesto ang Big Chill sa likod ng nangungunang Hogs Breath Cafe (6-0).
Kabilang sa mga inaasahan ni Tiu ang mga ex-pro na sina Khasim Mirza at Jason Ballesteros.
Ang Cagayan Valley Rising Suns ni coach Alvin Pua ay may 6-2 record. Ang Rising Suns ay pinayuko ng Hog’s Breath Cafe (82-78) at baguhang Wang’s Basketball Couriers (76-74).
Kaya naman sinasabi ni Pua a kailangang manatili ang concentration ng kanyang mga bata mula umpisa hanggang dulo ng bawat laro.
Kabilang sa mga inaasahan ni Pua sina John Pinto, Prince Caperal, Kenneth Ighalo at Mark Bringas.
Ang Cafe France ni coach Egay Macaraya ay galing sa 74-69 panalo sa National University-Banco de Oro at may 4-3 record para sa ikapitong puwesto. Umaasa si Macaraya na maitutuloy nila ang mga panalo upang makarating sa quarterfinals.
“It’s still very much possible. Kailangan na maniwala kami na kaya namin,”aniya.
Ang Zambales M-Builders ni coach Junel Mendiola ay may dalawang panalo sa limang laro.
(SABRINA PASCUA)
