HATAW! D'yaryo ng Bayan hatawtabloid.com
HINIHINTAY na ng mga sinalanta ng super typhoon Yolanda ang biyayang inaasahan nilang matatanggap mula kay bagong WBO welterweight champion Manny Pacquiao.
Ayon sa ilang residente ng Bogo City sa Northern Cebu, umaasa silang mababahagian din ng “balato” sa panalo ng Filipino ring icon.
Una rito, kinompirma ni Top Rank promoter Bob Arum na aabutin ng $30-million ang kikitain ni 8-division world champion Manny Pacquiao sa laban kay Brandon Rios.
Ayon kay Arum, mayroon guaranteed purse ang Filipino ring icon na $18 million at posibleng tataas pa ito sa pay-per-view revenue.
Kamakalawa, pansamantala munang kinalimutan ng typhoon survivors ang kinakaharap na problema para abangan ang laban ni Pacquiao kontra kay Brandon Rios.
Dumadagundong na hiyawan at sigaw ng pagsuporta para sa Filipino ring icon ang yumanig sa mga venue kung saan napanood nang libre ang laban.
Maging sa town plaza ng Ormoc City; Guiuan, Eastern Samar; Estancia at Concepcion, Iloilo; at Medellin, Cebu ay nagbunyi rin ang typhoon survivors sa panalo ni Pacquiao.
GAMOT SA TRAUMA
ITINUTURING na isa sa mabisang gamot sa pagtanggal ng trauma ang pakikinig at panonood ng masisiglang bagay, katulad ng isang exciting na boxing match nina Filipino boxing superstar Manny Pacquiao at American fighter Brandon Rios.
Ayon kay DSWD Sec. Dinky Soliman, isa sa maselang isyu pagkatapos ng kalamidad ay ang naiiwang trauma, lalo na ang mga labis na nasalanta ng katulad ng super typhoon Yolanda na may kasamang mataas at malakas na storm surge.
Sinabi ni Soliman, gumagaling naman ang trauma ngunit maingat ang dapat na ginagawang proseso.
Ayon naman kay Red Cross Secretary General Gwendolyn Pang, mainam ang mga mapaglilibangan para mapawi ang lungkot at takot ng mga nakaranas ng kalamidad o ano mang uri ng trahedya.
Sa Tacloban City, Cebu at maging sa Metro Manila ay ginamit ng mga social worker ang laban nina Pacman at Rios para matanggal ang trauma ng mga biktima ng bagyo.
Para sa social workers, masasabing epektibo nga ang naturang pamamaraan dahil bakas sa mukha ng mga nasalanta ng bagyo ang sigla, tuwa at excitement matapos mabalitaang ang kanilang pinanabikang laban ay handog ng Pinoy champion sa mga tulad nilang nasalanta ng kalamidad.
(HNT)
