2 suspek sa pananaksak sa principal, timbog

NAARESTO ng mga elemento ng Pakil PNP ang dalawang suspek sa pananaksak sa isang elementary school principal sa Brgy. Bano, bayan ng Pakil, sa lalawigan ng Laguna.

Ayon sa report ni Senior Insp. Jojo Sabeniano, hepe ng Pakil Police, kay Laguna PNP Provincial Director, Senior Supt. Pascual Munoz, Jr., kinilala ang biktimang si Arnel Macabasco, 47, principal ng Pangil Central Elementary School at residente ng Brgy. Bano Pakil, Laguna, habang ang mga suspek ay kinilalang sina Joar Sarmiento, 20, at Mark Leo Sanchez, 19, kapwa residente ng Brgy. Gonzales, bayan ng Pakil.

Ang mga suspek ay naaresto ng mga awtoridad sa kanilang bahay sa follow-up operation.

Nabatid sa imbestigasyon ni PO3 Anthony Francisco, dakong 2:45 a.m. nang bumisita ang mga suspek sa bahay ng biktima.

Nagkaroon sila ng mainitang pagtatalo na naging dahilan upang saksakin ng mga suspek ang biktima.

Naisugod ang biktima sa General Cailles District Hospital para malapatan ng lunas.

Ang mga suspek ay nahaharap sa kasong frustrated homicide.

(BOY PALATINO)