HATAW! D'yaryo ng Bayan hatawtabloid.com
BILANG anak ng MACHO at BARAKONG si namayapang ex-Pasay City Mayor PABLO CUNETA, namana ni Ms. Cuneta Sharon ang mapanghamong ugali ng kanyang ama.
Ganito kasi ang ugali at nakasanayan ng mga POLITIKO noong araw, ‘yun bang tipong ‘TAYAAN ng BAYAG’ para mapatunayan na TOTOO at TAMA ang sinasabi nila.
Kung ikaw ang hinahamon at medyo totiyope-tiyope ka ‘e tiyak hindi ka KAKASA sa BRINKMANSHIP ng humahamon sa iyo.
Kaya naman nang may nagtanong kay Ms. Shawie kung ang kanyang asawa ba na si dating Senator Francis ‘Kiko’ Pangilinan ay hindi sangkot sa Priority Development Assistance Fund (PDAF) o pork barrel scam agad sumagot sa kanyang Twitter Account si Ms. Shawie nang ganito: “His (pork barrel) was all well-accounted for, napunta sa lahat (nang) dapat puntahan.”
Nang isama ni Senator Denggoy este Jinggoy Estrada ang pangalan ni Senator KIKO sa mga mayroon din umanong kwestiyonableng transaksiyones sa kanyang pork barrel, ‘e muling nagsalita si Ms. Shawie.
Gaya nang hamon niya noon na magbibigay siya ng P1 milyon kung sino man ang makapagbibigay sa kanya ng ebidensiya na mayroong ‘mistress’ ang kanyang asawa, ngayon naman ay muling naghamon si Ms. Shawie na kung sino man ang magkapagpapatunay na may anomalya sa ‘pork barrel’ ng kanyang asawa ay bibigyan niya ng P10 milyon at iiwan pa raw niya ang Senador na nagtapos ang termino nitong Hunyo 2013.
Ganoon daw kasi kataas ang tiwala ni Ms. Shawie sa kanyang hubby.
Kaya naman bilib tayo sa tapang o brinkmanship ni Ms. Shawie, kumbaga sa mga Batangeño ‘e parang bente-nueve sa talas. Wala tayong pagdududa na kayang gawin ni Ms. Shawie ang kanyang sinasabi.
Pero concern tayo na baka siya ay masilat dahil mismong ang Commission on Audit (COA) ay mayroong sinasabi na mayroon pang ‘unliquidated’ sa pork barrel ni Sen. Kiko.
E sa totoo lang, sa loob ng 12 taon na naging Senador ang kanyang lovey doods ‘e wala naman siyang naimarka maliban sa bansag na Mr. NOTED at Mr. KORNIK.
‘E marami pa ngang natuwa nang matapos na ang termino niya. Kumbaga. Good riddance, Mr. Noted.
Inuulit ko, bilib tayo sa BRINKMANSHIP ni Ms. Shawie, ‘wag lang nga sana siyang MASILAT sa pagkakataong ito.
Wish lang natin, sana ay magarantiyahan siya ng kanyang hubby.
‘Di ba, Ms. Shawie?
SEN. FRANKLIN ‘DRIBOL’ este DRILON ALLERGIC SA ‘BFF’ NA SI JANET LIM NAPOLES
NAGTATAKA naman tayo rito kay Senate President Franklin ‘Dribol’ este Drilon.
Bakit ba ayaw niyang pirmahan ang subpoena na ipinahanda ni Senate Blue Ribbon Committee TJ Guingona para humarap ang kanyang ‘BFF’ na si Janet Lim Napoles sa Senado?
Masyado ba siyang ‘allergic’ ngayon kay Napoles?!
Nahihiya ba siya sa dating ka-party-goer niya at ka-outreach ng misis niya o ikinahihiya niya si Napoles dahil sa eskandalong kinasusuungan ngayon?!
Naman?!
Hindi ba niya nami-miss si Napoles?!
Ayaw ba niyang magkaroon sila ng get-together sa Senado?!
Kaya hindi na tayo magtataka kung isang araw ‘e biglang sumabog si Napoles at biglang ‘rumatsada’ ng pagtuturo sa sobrang sama ng loob.
S’yempre sa sama ang loob niya dahil noong panahon na napakikinabangan pa siya ay ipinagmamalaki siya at hindi nahihiyang ibando sa publiko ang asosasyon sa kanya.
Pero nang masilat si Napoles, at sumabog ang P10-bilyon pork barrel scam ‘e bigla siyang ‘ITINATWA’ ng kanyang mga ‘KASABWAT.’
Sabi nga ni Ms. Gigi Reyes … ang pinakamasaklap na kataksilan na naranasan niya ay ang ‘ilaglag’ siya ng kanyang dating bossing.
Mutual siguro ang ‘feelings’ nila ngayon ni Napoles.
Mutual ang kanilang pakiramdam na sila ay ‘inilaglag’ ng mga dating nakikinabang sa kanila.
Pero meron pa bang sasaklap sa pakiramdam ng sambayanang NINAKAWAN?!
Anyway, Senate President Franklin ‘Dribol’ este Drilon, pirmahan mo na ‘yang subpoena para walang masabi sa iyo ang mga kapwa mo Senador.
Sort of … get together?!
Give her (Napoles) a chance to see you once more, Mr. Senate President!
MAJOR EDUARDO SY, BIKTIMA NG MAPANIRANG TEXT
NAGULAT tayo sa mga text na ipinadala sa aming 3 pahayagan tungkol sa isang Major Sy na ayon sa texter ay abusado raw at pinahihirapan ang vendors na katabi ng pwesto ng misis nya. Ipina-verify ko ang text na ito sa ating mga Bulabog boys sa Divisoria mall, at nalaman natin na walang katotohanan ang text/sumbong na ito. Ayon sa mga vendor sa naturang lugar ay madalang raw na makita nila si Major Sy sa Divi Mall at ang asawa nya ay nasa tamang sukat ang latag ng paninda. Kung makita man nila si Major Sy ay mag-isa lang at walang alalay na pulis. At kung kumain pa raw ito ay nagbabayad naman .Hindi rin daw doon naka-assign si Major Sy kaya malabo na mag-operate siya roon. Hindi ko personal na kilala si Major Sy, pero ako’y naniniwala na isang paninira lang ang mga text na ipinakakalat ng isang taong may inggit o galit sa kanya.
Para sa mga reaksiyon, suhestiyon, reklamo at sumbong, magtext sa 0915.804.7630 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
