HATAW! D'yaryo ng Bayan hatawtabloid.com
ISANG kaso pa ng panggagantso ang nakalkal ng Commission on Audit kaugnay pa rin ng paggamit ng mga PEKENG non-government organization (NGO) ni Janet Lim Napoles sangkot ulit sina Senator Juan Ponce Enrile, Senator Jinggoy Estrada at Senator Loren Legarda.
Ang proyekto ay liquid fertilizer at plastic sprayer na nagkakahalaga ng P38 milyon mula sa Priority Development Assistance Fund (PDAF) o pork barrel ng mga nabanggit na Senador.
Bagamat mayroong nai-deliver na fertilizer at plastic sprayer ang People’s Organization for Progress and Development Foundation Inc., (POPDFI), hindi naman ito napakinabangan ng mga magsasaka dahil low grade at depektibo.
Bawat package ng nasabing fertilizer at plastic sprayer ay nagkakahalaga ng P20,000 to P35,000.
Hanep ang pangalan ng bawat package.
Merong organic agrarian implement packages sa halagang P36,450; high value yield enhancement packages sa halagang P20,500; farm inputs and implements worth P20,500 per package.
Pero nang magtanong ang mga magsasaka sa isang tindahan ang nasabing package ay mabibili lamang sa halagang P1,000!
Pakengsyet!!!
Ibig sabihin kumita ang mga MANDARAMBONG ng P19,000 hanggang P34,000 bawat isang package?!
‘E ilang package lahat iyon?
Mantakin ninyo ang P38,000 milyon?
Sa report ng Commission on Audit (COA) natuklasan na nabigo ang Dinalupihan government na isumite ang mga kinakailangang supporting documents para sa release, implementation at liquidation ng pondo.
Pero ayon naman kay dating Dinalupihan Mayor Joel Payumo, naroon ang isang taga-COA mismo nang ipamahagi sa kanila ang nasabing agricultural packages.
Nagtaka rin sila kung bakit POPDI ang naging implementor ng project pero hindi na sila umangal dahil ang katwiran nga nila dapat silang matuwa dahil napili silang benepisaryo ng nasabing proyekto.
Mismong sina Enrile, Legarda at Estrada umano ang nagtalaga sa POPDFI bilang “implementer of the project.”
Tsk tsk tsk…
Ang sakit ng katotohanan na matagal na palang ginagago ng mga kagulang-gulang ‘este’ kagalang-galang nating mga Senador ang sambayanan.
‘Yan po ang eksaktong larawan ng sinasabing ‘IGINISA TAYO sa SARILING MANTIKA.’
Hindi pa ba ibabalik ang PARUSANG BITAY?!
D’yan ko hinahangaan ang China sa pagpapatupad ng batas, CONSISTENT.
Sa China, ibinibitay ang mga tulak ng droga at mandarambong at taksil na opisyal ng bayan.
Sana ganoon rin tayo rito sa Philippines my Philippines.
Mangyari kaya?!
EFFICIENT COLLECTIONS HINDI REALTY TAX HIKE SA PARAÑAQUE CITY
NANININDIGAN si Parañaque Mayor EDWIN OLIVAREZ na sa kanyang termino ay hindi siya magtataas ng buwis sa REALTY. Kahit ‘yan pa ang ipinapayo ng Commission on Audit (COA).
Aniya, ang kailangan ay ‘EFFICIENT COLLECTION’ ng buwis hindi ang pagtataas ng buwis.
Sinabi niya ito nang basbasan ang bagong treasurer’s office at taxpayer’s lounge sa city hall nitong nakaraang Huwebes.
Inuulit din ni Mayor Olivarez ang kanyang posisyon laban sa Ordinance No. 11-11 na nagtatakda ng pagtataas ng real property market values na ipinasa ng dating administrasyon noong October 2011.
Ang nasabing Ordinansa ay nakabatay umano sa panawagan ng Local Government Code para sa revision ng real property value assessment kada tatlong taon. Ang huling assessment umano sa lungsod ay noong 1997.
Pero kinontra ito sa Supreme Court ng grupo ng mga homeowners association at nakakuha ng temporary restraining order (TRO) kaya nasuspendi ang implementasyon nito sa November 2011.
Kaya nga maraming natuwang Parañaqueño.
Naniniwala tayo sa kasabihang ang mabuting mamamayan ay nagbabayad ng tamang buwis. Pero naniniwala rin tayo na ang mabuting pamahalaan ay naglilingkod nang tama at tapat sa kanyang mamamayan.
Naniniwala rin tayo sa sinasabi ni Mayor Edwin Olivarez na mas tumpak na magkaroon muna ng efficient tax collection kaysa magtaas nang magtaas ng realty tax.
At d’yan natin masasalamin ang isang mahusay na pinuno ng bayan.
Mabuhay ka Mayor Edwin Olivarez!
Para sa mga reaksiyon, suhestiyon, reklamo at sumbong, magtext sa 0915.804.76.30 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
