HATAW! D'yaryo ng Bayan hatawtabloid.com
LAGUNA – Agad binawian ng buhay ang isang hinihinalang asset ng pulis makaraang pagbabarilin sa harap ng kanyang misis ng dalawang hindi nakilalang salarin kamakalawa sa San Vicente Road, Brgy. San Vicente, bayan ng San Pedro.
Kinilala ng pulisya ang biktimang si Neil Depano, 40, naninirahan sa Bonifacio Street, Purok 1, Brgy. Magsaysay ng nabanggit na lugar. Ayon sa ulat, dakong 8:30 p.m. habang ang biktima at ang misis niyang si Rhodora Depano, 39, sales clerk, ay lulan ng motorsiklo nang paputukan ng mga suspek ngunit hindi sila tinamaan.
Gayonman, patuloy pa rin silang hinabol ng mga salarin na lulan din ng motorsiklo ngunit nawalan ng kontrol sa motorsiklo si Depano kaya bumangga sa isang kotse. Sumakay ang biktima sa jeep ngunit hinabol pa rin sila ng mga salarin at muling pinaputukan si Depano na kanyang ikinamatay.
(BOY PALATINO)
