Anak ni Bogs Adornado kasama sa draft (PBA D League)

NAGPALISTA ang anak ni dating PBA MVP William ‘Bogs’ Adornado para sa kaunaunahang rookie draft ng PBA D League na gagawin sa Setyembre 19.

Kasama si Josemarie Adornado sa 16 na manlalaro na nais makapaglaro sa D League na ang bagong season nito ay magbubukas sa Oktubre 24.

Kasama ang batang Adornado sa Team B ng Ateneo Blue Eagles.

Bukod kay Adornado, ang iba pang nagpalista sa draft ay sina Chris Banchero ng San Miguel Beer ng ABL, Fil-Australian Mark Franco, Robert Angelo Packing ng Far Eastern University (Team B), Alejandro Adovas (STI), Michael Camposagrado (Divine World College of Abra), at Krist Edward Pao (University of Cebu).

Unang pipili sa draft ang Cafe France at kasunod nito ang Cebuana Lhuillier, Boracay Rum, Big Chill, Blackwater Sports, NLEX, Cagayan Valley, Hog’s Breath at Jumbo Plastic, ayon sa pagkakasunod.

Lottery naman ang gagamitin para sa mga bagong koponang papasok sa D League.

(James Ty III)