Tetay, mapagpatol sa basher; Imee Marcos, deadma lang!

SIGURO nga sinasabi ng iba na tama ang ginagawa ni Kris Aquino na sinasagot niya ang lahat ng mga kritisismo laban sa kanya sa social media. Siguro nga may mga taong sanay sa showbiz na ang gusto o masasabing natural na sa kanila iyong ganoong may nagbabakbakan. Pero kung mangingibabaw nga ang protocol, o masasabing proper decorum, ang dapat sana hindi na pinansin ni Kris iyong mga nagsasabi sa social media na “cheap” siya.

Una, tingnan naman ninyo. Ilan ba ang nakababasa ng sinasabi ng mga iyon sa social media? Dahil sa ginawa pang pagsagot ni Kris, mas marami pa ang nakaalam na may nagsabing “cheap” siya, kasi mas marami siyang followers eh, at kung ano man ang sabihin niya ay lumalabas sa newsfeed ng lahat ng mga iyon. Hindi maikakaila na dahil siya ay TV personality din, siya ay isang public property, at ano man ang kanyang sabihin kahit na sa social media account lamang niya, tiyak na mapi-pick up ng legitimate media. Kung ma-pick up iyan, mas marami pa ang makaaalam niyan.

Hindi ba mas mabuting iyong mga ganyan ay hindi na lang mapag-usapan kaysa masabing nakikipagtungayawan ka sa isang taong hindi naman kilala ng publiko, samantalang ikaw bukod sa pagiging artista ay isang “presidential sister”? Hindi mo tuloy maiaalis na gumawa ng comparison. Noong araw, mas marami ang mga bashing na nangyari kay Imee Marcos, kahit na sabihin mong wala pang social media noon. Noong mawala sila sa poder, aba mas matindi pa ang mga paninira. Pero pinansin ba niya isa man sa mga iyon? Nakipagtungayawan ba siya? Hindi naman ganoon ang nakagisnan niyang level niya eh bakit nga naman niya papatulan iyon?

Minsan hindi kailangang magpadala sa emosyon. Minsan naman kailangang isipin ang tamang attitude kahit na sabihin mong napipikon ka na. Isipin ang proper decorum. Kailangang isipin niya ang tamang protocol, kasi presidential sister siya eh. Iyang pakikipagtungayawan sa social media ay hindi daang matuwid.

HATAWAN – Ed de Leon