Mike, 10 taon nang karelasyon ang non-showbiz GF

HINDI rin nila napaamin sina Carla Abellana at Tom Rodriguez tungkol sa kanilang relasyon, kahit na halos dikdikin na sila ng media noong press conference ng No Boyfriend Since Birth. Karapatan naman nila iyon. Iyong press conference ay ipinatawag naman para sa kanilang pelikula at hindi naman para sa relasyon nila. Kung may ginawa silang admission, malamang iyon ang mas mapag-usapan at maging issue at matatakpan ang pelikula na gusto nilang mai-promote. Kawawa rin naman ang ibang mga artistang kasama nila.

Bahagya na nga lang natanong sa presscon sina Mike Tan at Bangs Garcia na mga supporting star sa pelikula dahil ang mas mahabang oras ay nauwi sa pagpapa-amin nina Carla at Tom tungkol sa kanilang relasyon. Isipin ninyo, kung umamin nga ang dalawa, ‘di lalong nangamote ang kanilang mga co-star na sina Mike at Bangs. Hindi mapag-uusapan ang mga iyon eh. Ngayon nga lang eh, hindi na mabanggit na naroroon din sila noong gabing iyon. Kawawa naman, pinapunta pa sila sa presscon kung hindi rin naman sila mapapansin.

Kaya sa palagay nga namin, hindi lamang para mapanatiling pribado ang kanilang relasyon ang talagang dahilan nina Carla at Tom sa hindi pag-amin. Respeto na rin iyon sa mga ibang artistang kasama nila sa pelikula na naroroon din sa press con, na malamang hindi na mapag-usapan kung sakali nga at umamin sila dahil mas malaking issue iyon.

Tingnan ninyo, noong gabing iyon inamin ni Mike na sila ng girlfriend niya ay 10 years nang magkarelasyon. Wala kaming nabasa tungkol doon. Ang nakita lang namin at naging issue na nga ay ang pagtanggi nina Carla at Tom na ayaw umaming magsyota na sila.

HATAWAN – Ed de Leon