HATAW! D'yaryo ng Bayan hatawtabloid.com
UMAABOT sa 59 state universities and colleges (SUCs) ang makararanas ng kaltas sa kanilang operating budget sa susunod na taon, habang 40 iba pa ang makatitikim ng kaltas sa kanilang capital outlay.
Sinabi ni Kabataan partylist Rep. Terry Ridon, sa unang tingin ay mas mataas nang kaunti ang P10.5 bilyon na 2016 budget ng buong Commission on Higher Education (CHED) ngunit kapag hinimay ito ay lalabas ang kaltas sa alokasyon sa SUCs.
Ngunit nang kanilang sumahin, ang kaltas sa maintenance and other operating expenses ng 59 na SUCs ay aabot sa P477.8 milyon habang P4.8 bilyon ang magiging bawas sa capital outlay ng 40 SUCs sa 2016.
Pinakamalaki ang kaltas sa MOOE ng Tawi-Tawi College of Technology and Oceanography, Mindanao State University at Iloilo State College of Fisheries.
Sa Western Visayas ang may pinakamaraming SUCs na nakaltasan ang MOOE sa bilang na walo, habang pangalawa ang Eastern Visayas na may pitong SUCs na may kaltas din ang MOOE sa susunod na taon.
Binanggit din ni Ridon na sa 40 SUCs na mababawasan ang capital outlay, ang University of the Philippines (UP) ang makararanas ng pinakamalaking kaltas sa halagang P2.2 bilyon.
At tatlong SUCs ang wala talagang alokasyon ng capital outlay kabilang dito ang Marikina Polytechnic College, Cagayan State University at Bulacan State University.
Sinabi ng mambabatas, ang mga kaltas na ito sa pondo ng SUCs ay nagdudulot na ng pagkaalarma sa mga opisyal ng mga paaralan at humihingi na ng saklolo sa kanilang mga kongresista.
WALKOUT IKINASA VS TAPYAS-PONDO SA SUCs
NAGKASA ng nationwide walkout ang mga estudyante mula sa state universities and colleges bilang protesta sa pagbabawas ng kanilang pondo para sa 2016.
Pangungunahan ito ng National Union of Students of the Philippines at Rise for Education Alliance sa Huwebes.
Bagama’t P43.8 bilyon ang pondo para sa 2016 na mas mataas kompara sa P42.3 bilyong pondo ngayong taon, babawasan ang budget ng 59 unibersidad para sa kanilang capital outlay at maintenance and other operating expenses (MOOE).
Sa budget hearing ng CHED, nabatid na kabilang sa babawasan ng budget ang University of the Philippines, sa kabila ng problema nito sa dormitoryo at classrooms.
