Ate Vi magbabalik-showbiz na, pahinga muna sa politika

HATAWAN – Ed de Leon . /

MAY nagpadala sa amin ng video ng mga sinabi ni Governor Vilma Santos, pati na ng kanyang pakikipagtalakayan sa mga OFW sa Italya. Maliwanag hanggang doon ang sinasabi ni Ate Vi, gusto na muna niyang magpahinga sa politika. Pinaninindigan din niyang hindi totoo na inaalok siyang tumakbo bilang vice president o senador, at wala pa talaga siyang plano.

Nang tanungin naman siya kung sino ang inaakala niyang presidentiable na matimbang sa kanya, hindi rin siya nagbigay ng kahit na anong comment, at sinabing masyadong malayo pa ang eleksiyon para pag-usapan iyon. Wala rin siyang comment nang tanungin siya kahit na tungkol kay Grace Poe.

Isang bagay ang nakikita naming maliwanag diyan, talagang desidido na si Ate Vi na magbalik-showbiz. Kung pag-aaralan mo naman kasing mabuti, mas malaki pa rin ang kikitain niya bilang isang aktres kaysa kinikita ng isang vice president ng Pilipinas. Siya na nga rin ang nagsasabi, siyam na taon siyang mayor. Siyam na taon siyang gobernador. Pero iyong kinita niya sa 18 taon, wala pa sa limang taong kinita ng anak niyang si Luis Manzano.

Isa pa, mahaba pa ang panahon niya para sa politika, at maganda naman kasi ang kanyang record. Pero bilang isang leading lady, sabihin na nating nakikipaghabulan na siya sa panahon, dahil hindi naman maikakaila na nagkaka-edad na rin siya. Sayang iyong napakaraming pagkakataon na nakakalampas sa kanya. Isa pa, ang iniaalok naman sa kanya ay iyong mga totoong pelikula, hindi naman siya iyong lalabas lang sa mga indie na hindi naipalalabas sa mga sinehan at barya-barya lang ang kita.

Nakumbinsi nga lang iyan ng mga taga-Batangas eh, at saka noon ang naisip niya, pagbabayad na rin iyan ng utang na loob sa publiko, iyong makapaglingkod siya nang tapat. Pero ngayon, alam naman niya marami siyang fans na sumuporta sa kanya simula pa noong una na masisiyahan kung magbabalik-showbiz na nga siya. Kung kami ang tatanungin, iyon naman ang dapat.