Miss World Philippines Valerie, desmayado rin sa MRT

HATAWAN – Ed de Leon . 

ISIPIN ninyo, pati ang naging Miss World Philippines 2014 na si Valerie Weigmann hindi na napigil ang pagpapahayag ng pagkadesmaya sa MRT. Inilabas niya iyan sa kanyang social networking account. Siguro nga hindi naman sumasakay talaga sa MRT si Valerie, pero madikit din kasi iyan sa masa dahil kung natatandaan ninyo, may panahong bukod sa pagiging isang modelo ay naging bahagi rin siya ng Eat Bulaga.

Actually nag-OJT lang siya noon sa Eat Bulaga, nang mapansin siya dahil talaga namang Tisay na Tisay at nang subukan naman nila ay nakatatawa naman siya, kaya naging regular.

Anyway, desmayado talaga si Valerie na nag-post pa ng picture ng mga commuter na naglalakad sa tabi ng riles ng MRT nang masira na naman iyon sa may Guadalupe station. May sinasabi pang may nag-g crack daw na riles ng tren sa lugar na iyon. Iyan ay sa kabila ng araw-araw na naririnig mo sa radio at sinasabi rin sa TV ang kapalpakan ng MRT matapos na magtaas pa sila ng singil sa pamasahe. Bakit nga ba ganyan sila kapalpak? Basta kami, simula noong lumampas iyang MRT sa riles doon sa Pasay, hindi na kami sumakay talaga.