Pooh at K, walang malisya sa ginawang lovescene

MAKATAS – Timmy Basil.

TIYAK na hindi kayo magsisisi kapag pinanood ang pelikulang Espesyal Kopol starring K Brosas at Pooh. Sa kuwento pa lang ng dalawa, matatawa ka na talaga.

Ang istorya, parehong manggagantso at nagkataon na sa isang boarding house sila nakatira. Nagka-developan at may lovescene pa raw sila.

Pero kahit na raw magkalapat ang mga ari nila ay wala raw talagang malisya at pagkatapos ng eksena ay tawa lang daw sila ng tawa.

Sa June 3 na ang showing ng Espesyal Kopol under Bagon Films ni Dhel Tan. Mapapanood sa SM Theaters ang Espesyal Kopol at after ng Philippine showing ay ipalalabas naman sa Canada na tagaroon ang partner ni Madam Dhel. Magkakaroon din ng shows sina K at Pooh doon kaya super segue sila roon.

Ang sabi ng PRO ng pelikulang ito na si Danny Batuigas, talagang

lulundag ka raw sa katatawa kapag pinanood ang Espesyal Kopol. Ito ay sa direksiyon niBuboy Tan na nakilala noon sa mga sexy movie.

Samantala, nakatsikahan ko si K before the presscon na ginanap sa Max’s Roces at ang sabi niya loveless siya ngayon, ni ka-text mate wala siya.

Yes, totoo ‘yun. Ni ka-text mate ay wala siya.

Kaya tutok ngayon si K sa kanyang career at sa pagpapa-aral ng kanyang anak na ang sabi ni K ay future beauty queen daw ito. Mahilig kasing manood ng pageant ang anak at may K na sumali dahil 5’8″ pala ang taas nito. Very talented din daw, magaling sumayaw. Tuwang-tuwa raw si K nang manalong Star of the Night ang anak sa Prom at Best dancer pa.

Si Pooh naman, sinabi niyang naiiba ang pagpapatawa. Hindi siya masyadong madada sa stage pero pailalim ang mga joke. Hindi siya maingay pero tagos sa buto ang impact ng kanyang jokes.

May personal inputs sina K at Pooh sa pelikulang ito, minsan ay hinahayaan silang dalawa ni Direk Buboy na mag-adlib basta hindi nawawala sa storyline.