Press Office sa NAIA T1 binaha ng ulan

MATATAPOS na ang sinasabing modernong rehabilitsayon ng Ninoy Aquino International Airport (NAIA) terminal 1 pero nagulat ang mga miyembro ng media na nakatalaga rito nang bumuhos ang ‘ulan’ mula sa kisame nito, kamakalawa ng gabi.

Nadesmaya ang mga mamamahayag nang bumungad sa kanila ang walang tigil na tulo ng tubig mula sa kisame ng computer room kaya’t agad nagdala ng balde ang ilang janitor at isinahod para bawasan ang pagbaha sa press office.

Kamakailan, hindi ikinatuwa ng ilang airline ground personnel nang tumagas ang ulan mula sa kisame patungo sa pre-departure east at west concourse ng ipinagmamalaking ‘newly-rehabilitated’ na NAIA terminal 1.

Anila, gumamit pa sila ng payong upang hindi mabasa ang mga pasahero na ihahatid nila patungo sa boarding gate dahil sa tumatagas na tubig sa kisame.

Ganito rin umano ang naranasan ng ilang pasahero sa arrival customs area at muntik pang madulas ang ilan sa kanila habang naghihintay ng kanilang bagahe.

Mahigit isang bilyong piso ang iginugol ng pamahalaan sa reahabilitasyon ng binansagang ‘worst airport’ sa buong mundo ngunit bigo at ‘palpak’ ang isinagawang waterproofing na pinaniniwalaang dahilan ng pagbaha.

Ang rehabilitation ng NAIA terminal 1 ay nasa pangangasiwa ng DMCI construction firm at matatapos umano ito ngayong buwan ng Hunyo. (JSY)