Gerald, puspusan na ang paghahanda sa concert!

 

SA June 13 na magaganap ang Gerald Santos Metamorphosis concert sa PICC at ngayon pa lang ay puspusan na ang paghahandang ginagawa ng Prince of Ballad na si Gerald Santos.

Sa birthday celebration na ginanap ni Gerald sa Citystate Tower Hotel kamakailan, sinabi nitong maraming bago at pasabog ang mapapanood sa kanyang concert. Marami raw ang makapigil-hiningang number kaya naman dibdiban ang pag-eensayo niya.

Ilan sa nabanggit ni Gerald ay ang pagsayaw at pagkanta ng mga awitin ni Michael Jacson na binibigyan niya ng maraming oras dahil mahirap pagsabayin ang pagkanta at the same time ay sumasayaw. “Kung minsan nga po mas nabibigyan ko ng pansin ang pagsayaw,” pag-amin ni Gerald. Maririnig din ang ibang awitin ni Bruno Mars.

Excited si Gerald sa gagawin niya sa concert lalo pa’t makakasama niya ang symphony orchestra na siyang tutugtog sa 2 ½ hours na concert niya.

“Marami po silang makikita at maririnig. Halo-halo po kasi ang aking repertoire. Hindi lang ‘yung sa nakasanayan nilang naririnig na mga kanta ko ang maririnig nila kundi pati rock, ballad, techno, pop. Kaya po evolution po talaga ng aking musika ang makikita rito,” sambit pa ni Gerald.

Wish ni Gerald na maging matagumpay ang Metamorphosis concert niya sa June 13 dahil tiniyak niyang mag-eenjoy ang sinumang manonood nito.

Makakasamang mabibigay-saya ni Gerald ang MICA, si Ali Forbes, Azrah Gaffor, Yuan Santiago at iba pang sorpresang guests. Front act naman ang Freshmen at Intensity at ito’y ididirehe ni Cocoy Ramilo at ang musical director ay si Jeremy Alex Salva.

ni Maricris Valdez Nicasio