Nangotong ng pang-inom nirapido sa sugalan

PATAY ang 36-anyos lalaki nang magwala sa isang sugatan dahil hindi binigyan ng pang-inom kamakalawa ng gabi sa Binondo, Maynila.

Idineklarang dead on arrival sa Metropolitan Hospital ang biktimang si Rolando Oltiano, sidecar boy, residente ng Soler St., Creekside, Binondo, Maynila.

Sa imbestigasyon ni PO2 Teddy Lim, ng Meisic Police Station (PS 11), naganap ang insidente dakong 11:15 p.m. sa creekside ng Soler St., Binondo.

Salaysay nang nakasaksi na si Cherelyn Casuse, nagtungo sa sugalan ang biktima na lango sa alak at humihingi ng P20 tong sa suspek na kinilalang si Vicente Casuco alyas Lito, 45-anyos, may asawa, family driver/bodyguard, ng 886 J, Room 402, Alvarado St., Binondo na noon ay nagsusugal ng tong-its.

Pinigilan ng saksi ang biktima sa pangungulit nang biglang naglabas si Oltiano ng balisong at itinutok kay Casuse.

Binalaan ng suspek ang biktima na itigil na ang ginagawa kundi ay babarilin niya si Oltiano. Pagkaraan ay inilabas ni Casuse ang kanyang baril at tinadtad ng bala sa ulo at katawan ang biktima. Pinaghahanap na ng mga awtoridad sa pangunguna ni SPO3 Glenzor Villejo ng Crime Against Persons Investigation Section, ang suspek na mabilis na tumakas makaraan ang insidente.

(LEONARD BASILIO, may dagdag na ulat sina MARY JOY SAWA-AN, DARWIN MACALLA, at JOSHUA MOYA)