Walang blackout knockout meron – Meralco

WALANG mararanasang “blackout,” “knockout” lang.

Ito ang siniguro ng Manila Electric Corporation (Meralco) sa bakbakan ni Rep. Manny Pacquiao at American undefeated boxer Floyd Mayweather Jr. ngayong araw.

Ayon kay Rolando Cagampan, senior vice president at head ng energy department ng Meralco, walang mararanasang brownout sa kalakhang Maynila sa pinakaaabangang “Battle for Greatness.”

Paliwanang niya, mas mababa ang demand ng supply ng koryente sa Linggo sa 20 hanggang 25 percent ngunit mas mataas ng 10 percent kapag may laban ang kongresista.

Siniguro niya na ang pagtaas ng demand ay kaya nilang tugunan at nakaantabay ang kanilang mga emple-yado kung makararanas man ng power shortage ang i-lang lugar.

Pagtitiyak niya, kahit magkaaberya ang pasilidad ng National Grid Corporation of the Philippines (NGCP), wala itong epekto sa power distribution ng Meralco at mananatiling ligtas ang kanilang mga pasilidad.

Habang siniguro ni outgoing Energy Secretary Carlos Jericho Petilla, may sapat na supply ng koryente ang Luzon at Visayas grid.

Sa Mindanao, hindi itinanggi ni Alsons Consolidated Resources vice president Joseph Nocos na posibleng makaranas ang ilang isolated na lugar ng brownout.

Gayonman, inihanda na nila ang ilang generator sets nang sa gayon ay makapanood ng laban ang lahat ng mga residenteng nasa malalayong lugar sa Mindanao.