Roxas, inspirasyon ng mga taga Dasmariñas

TUMABA ang puso ni Department of Interior and Local Government Secretary Mar Roxas matapos siyang bigyan ng parangal sa ika-16 na Gawad Karangalan ng Dasmariñas City sa Cavite sa pagiging inspirasyon niya sa mga mag-aaral ng lungsod.

Pinuri ni Dasmariñas Mayor Jennifer Austria-Barzaga ang mga nakamit ni Roxas sa kanyang pagseserbisyo publiko mula noong kongresista, senador at ngayon ay muling pagiging miyembro ng Gabinete.

“Palagi po nating alalahanin na marami ang tumulong. Nariyan ang local officials, ang mga magulang na nagtrabaho, na nagsakripisyo para maibigay ang magandang buhay,” ani Roxas.

Ayon kay Roxas, bahagi ito ng kanyang trabaho at marapat na alalahanin at magsakripisyo para sa nakararami.

Taon-taong pinararangalan nina Dasmariñas City Lone District Rep. Elpidio F. Barzaga, Jr., City Mayor Jennifer Austria-Barzaga, Vice Mayor Valeriano Encabo, DILG, at mga kasapi ng Sangguniang Panlungsod at Sangguniang Panlalawigan ang mga natatanging mag-aaral sa Dasmariñas.

Higit sa 1,330 mag-aaral ng elementarya, high school, college, post-grad, board or bar exam passers ang kinilala ngayon 2015 at tumanggap ng kabuuang P2.405 milyon.