Kaso ng Pinay na bibitayin idinulog sa int’l org

DUMULOG ang militanteng grupong Gabriela sa isang international organization para mailigtas ang Filipina na nasa death row sa Indonesia.

Ayon kay Gabriela Partylist Rep. Emmi De Jesus, nagpadala na sila ng liham sa Women in Parliaments Global Forum (WIP).

Hiling nila sa mga kababaihang mambabatas na makiisa sa pakiusap kay Indonesian President Joko Widodo para bigyan ng clemency ang Filipina convict na si Mary Jane Veloso.

Taon 2011, naaresto si Veloso makaraan mahulihan ng mahigit dalawang kilong heroin sa Yogyakarta Airport. Depensa ni Veloso, hindi niya alam na may droga sa maleta, na ipinakiusap lang sa kanya ng isang kaibigan.

Una nang tinanggihan ni Widodo ang pakiusap ng gobyerno ng Filipinas na ibaba sa habambuhay na pagkakakulong ang parusa kay Veloso. Sunod na umapela ang pamahalaan sa Indonesian Supreme Court ngunit ibinasura rin ito.