HATAW! D'yaryo ng Bayan hatawtabloid.com
NANAWAGAN si Sen. Sonny Angara sa Bureau of Internal Revenue (BIR) na padaliin ang proseso ng paghahain ng income tax returns (ITR).
Giit ng chairman ng Senate Commitee on Ways and Means, marami pa rin ang nahihirapan sa pagbabayad ng buwis gamit ang Electronic Filing and Payment System (eFPS).
Bukod aniya sa technical glitches sa BIR website, hindi rin pamilyar sa sistema ang mga kawani nito na dapat sana ay aalalay sa mga taxpayer.
Binanggit din ni Angara ang ulat ng World Bank na “Paying Taxes 2015” na nagsasabing 123 oras o 8 araw ang inuukol ng karaniwang Filipino sa pagbabayad ng buwis.
Kaugnay nito, ipinaalala ng senador ang atas ng Anti-Red Tape Law na bawasan ng mga ahensiya ng gobyerno ang oras at requirements sa pagproseso ng mga dokumento.
Handa aniyang tumupad sa buwis ang publiko kaya hindi na dapat padaanin pa sa mahaba at komplikadong sistema.
Nakipag-ugnayan na si Angara sa BIR upang mai-upgrade ang electronic system lalo na para sa maliliit na magbubuwis.
Kompiyansa rin ang mambabatas na mas maraming mahihikayat na magbayad ng buwis kung simple ang sistema, na magpapataas sa tax revenue.
