Veloso case sa Indonesia may remedyong legal pa

TINIYAK ni Vice President Jejomar Binay sa pamilya ni Mary Jane Veloso, ang Filipina sa death row sa Indonesia, na may legal remedies at options pang natitira para mailigtas ang OFW.

Una rito, nakipagkita sina Celia at Cesar Veloso, magulang ni Mary Jane, sa Bise Presidente sa Makati City Hall para pag-usapan ang mga hakbang ng gobyerno para maisalba ang buhay ng kanilang anak.

Ayon kay Binay, siya ring presidential adviser on OFW concerns, hinihintay na lamang nila ang tugon ni Indonesian President Joko Widodo kaugnay sa kanilang apela na ibaba ang sentensiya ni Mary Jane.

Inatasan na rin niya si Assistant Foreign Affairs Secretary Minda Calaguian-Cruz na maghain ng pangalawang petisyon para sa judicial review para sa kaso ng Filipina.

Ang 30-anyos na si Veloso ay sinentensiyahan ng kamatayan sa pamamagitan ng firing squad makaraan mahulian ng 2.6 kilograms ng heroin sa Yogyakarta Airport noong Abril 2010.