Pinay tumalon sa gusali sa UAE (Tangkang gahasain ng Pakistani)

TUMALON sa mataas na bahagi ng gusali sa United Arab Emirates (UAE) ang isang 21-anyos Filipina nang tangkang pagsamantalahan ng isang Pakistani driver.

Sa paglilitis sa Dubai Court of First Instance nitong Miyerkoles, Marso 18, sinabi ng piskalya na nagpasama ang 28-anyos Pakistani driver sa biktima sa opisina para kunin ang ilang dokumento.

Nang makapasok sa opisina, isinara ng suspek ang pintuan, naghubad ng damit, pinatay ang ilaw at pinagtangkaang halayin ang Filipina.

Ayon sa biktima, alam niyang wala nang ibang paraan kaya nilansi niya ang suspek. Sinabi niyang hindi siya makahinga at kailangan niya ng tubig para maihanda ang sarili sa lalaki.

Agad siyang nakapagpadala ng mensahe sa facebook account ng kaibigan upang siya ay tulungan.

Sinabi ng biktima, dakong 5:30 p.m. Nobyembre 9, nang mangyari ang insidente sa isang tanggapan sa Global Village sa Naif.

Kumuha ng upuan ang biktima at sinabi sa lalaking tatalon siya, ngunit tinawanan lamang siya dahil hindi naniwala na kanya itong gagawin.

Ngunit itinuloy ng Filipina ang pagtalon. Nawalan siya ng malay at nang magising ay marami nang tao sa kanyang paligid na agad siyang isinugod sa pagamutan.

Sumuko ang suspek sa himpilan ng pulisya at sinabing wala siyang ginawang masama sa Filipina kaya’t walang dahilan upang siya ay tumalon sa bintana. 

Jaja Garcia