Hindi hangad ni Toni na bastusin ang mga kandidata

ni Ed de Leon

HINDI rin namin gustong pansinin ang isa pang issue hanggang hindi namin nakikita mismo. Ang tinutukoy namin ay iyong sinasabi nilang “pinaglaruan” daw ni Toni Gonzaga ang mga Binibining Pilipinas candidate. Pero mahirap hindi pansinin eh, dahil sa marami ng reaksiyon mula sa mga kilalang personalidad. Kabilang na riyan ang beauty queen na si Nina Ricci Alagao, ang kilalang couturier na si Cary Santiago, at maging si Governor Joey Salceda.

Sa internet, naku maliligo kayo sa rami ng reaksiyon ng netizens. Hindi mo masasabing hindi mo nakita, naghambalang din ang mga video share na ginawa ni Toni sa Binibining Pilipinas.

Simple lang naman ang nakita namin, hindi naman siguro hangad ni Toni na bastusin ang candidates pero talagang comedy bar ang peg ng kanyang hosting. Hindi naman siya inawat ng director o ng production staff sa kanyang ginagawa, kasi siguro natatawa sila, natatawa rin ang live audience, kaya ang tingin nila cute iyon at ok lang. Pero wala nga iyon sa ayos.

Ang hangarin lang siguro ni Toni ay magpatawa para huwag mainip ang kanilang audience. Mali nga lang ang type ng pagpapatawa niya.