Alyas Tom Cat (Part 18)

NAKAGAWA NG PARAAN SI SGT. TOM NA MAGKITA SILA NG KANYANG MAG-INA

Sa iba’t ibang pagkakataon kasi ay kinakailangan niyang tumikim ng shabu o marijuana. Bahagi iyon ng trabaho niya noong kasagsagan ng pagmamanman niya sa mga drug addict, drug pusher at drug dealer. Mara-ming taon din siyang gumamit ng droga sa pakiki-jamming sa mga adik at pagtikim-tikim niyon sa pakikipagtransaksiyon sa mga tulak at malalaking drug dealer.

Hindi siya nakatulog sa buong magdamag. Kinabukasan ay maaga siyang nagbangon sa higaan. Nag-text siya sa kanyang Kuya Atong. Sinabi niya sa nakatatandang kapatid na gagamitin niya ang cellphone nito para tawagan ang asawang si Nerissa.”Posibleng naka-bug ang telepono ko kaya cellphone mo muna ang ga-gamitin ko, Kuya…” ang paliwanag niya sa kapatid. Na hindi naman tumanggi nang pasikreto silang magkita sa mismong bahay nito, hindi ka-layuan sa pag-aaring talyer.

Nakausap ni Sgt. Tom si Nerissa sa cellphone. Napaiyak ang asawa niya sa pangu-ngumusta nila sa isa’t isa. Pinigil niya ang emosyon. Sinabihan niya ito na magkita sila sa isang fastfood sa labas ng Maynila. Pero sa gabi lang pala ang oras nito sa pakikipagtagpo sa kanya. “Hindi ako pwede sa araw dahil katu-katulong ako sa karinderya ng pinsan ko…” katuwiran ng misis niya. Kaya “Sige, Mahal… Mga bandang alas-otso ng gabi tayo magkita,” ang mungkahi niya. At binilinan niya si Nerissa na isama ang kanilang anak sa lugar na napagkasunduan nila.

Nakaharap niya ang asawang si Nerissa at ang anak na si Yeye sa isang sikat na fastfood na malapit sa malaking mall ng Imus. Mula nang magtago siya ay noon lamang niya muling nakapiling ang mag-ina. Mahigit dalawang buwan na pala ang nakalilipas. Pero nasentro ang paksa ng pag-uusap nilang mag-asawa sa kani-kanilang kasalukuyang katayuan sa buhay. At, oo, kapwa naghihirap ang kanilang mga damdmin. At naibalita rin nito sa kanya: “Panay ang rekorida ng patrol car ng mga tanod sa tinatauhan kong karinderya. At iniikot-ikutan din ako roon ng mga nakasibilyang pulis.”

(Itutuloy)

ni Rey Atalia