QCPD official utas sa tandem (Checkpoint nalusutan)

SINISIYASAT ng mga operatiba ng QCPD-SOCO ang sasakyan ni Chief Insp. Roderick Medrano makaraan tambangan ng apat hindi nakilalang mga suspek na lulan ng motorsiklo sa Brgy. Kaligayahan, Zabarte Road, Novaliches, Quezon City. (ALEX MENDOZA)

SA kabila ng kaliwa’t kanang paninita ng mga tauhan ng Quezon City Police District (QCPD) sa mga motoristang nakasakay ng motorsiklo bilang tugon sa kampanya laban sa riding in tandem, muling nalusutan ang mga awtoriadd at naisakatuparan ang pagpatay sa isang opisyal ng pulisya kahapon ng umaga sa lungsod.

Napatay ng tatlong hindi nakilalang salarin na sakay ng motorsiklo si Chief Insp. Roderick Medrano, nakatalaga sa Novaliches Police Station 4, nakatira sa Zabarte Road, Novaliches, Quezon City.

Isinugod si Medrano sa Bernadino Hospital ngunit hindi na umabot nang buhay dahil sa tama ng bala ng Uzi at kalibre .45 sa katawan.

Sa ulat kay Chief Supt. Richard A. Albano, QCPD District Director, dakong 8 a.m. nang tambangan ang biktima ng mga suspek sa Zabarte Road, Hubart Subd., Brgy. Kaligayahan, Novaliches.

Sakay ng Honda Civic  si Medrano kasama ang dalawang anak at asawa nang pagbabarilin ng dalawa sa tatlo ang ang pulis.

Tanging ang pulis lamang ang pinagbabaril ng mga salarin habang ang mag-iina ay hindi pinatamaan.

(ALMAR DANGUILAN)