SC masusubok sa DAP

MASUSUBOK ang indepensensya ng Korte Suprema sa isyu ng Disbursement Acceleration Program (DAP) lalo’t higit ang mga mahistrado nito. Sila ba ay tapat sa bayan o sa pangulo ng bansa na si PNoy?

Magmula kasi nang binigyan nila ng paghuhusga na ilegal ang PDAP o Priority Development Assistance Fund (PDAP) ay lalong naging maliwanag pa sa sikat ng araw na ilegal ang DAP.

Mabigat ang magiging desisyon ng Korte Suprema sa DAP dahil dito nakasalalay ang buhay ni PNoy matapos ang kanyang termino.

Sasabit na nga siya sa PDAP, tapos ay tiyak na mas mabigat ang DAP at dito tiyak hindi siya malalayo sa kinasapitan nina Erap at GMA dahil siguradong plunder rin ang ihahain sa kanyang reklamo matapos ang 2016.

Malinaw naman kasi sa Konstitusyon na ilegal ang DAP dahil ang lahat ng savings ng pamahalaan ay dapat idaan sa supplemental budget na inaaprubahan ng Kongreso.

Diyan tiyak sablay ang PNoy government at kung hindi magpapa-impluwensya ang mga miyembro ng Kataas-taasang Hukuman ay tiyak matutulad din ang DAP sa PDAP.

Simple lamang ang ibig sabihin ng ganon, mapapaaga ang paggawa ng demanda ng kanyang mga kalaban kay PNoy at sa iba pang utak ng DAP at mga nakinabang sa pondo.

Hindi naman lingid sa lahat ang balitang ang DAP at PDAP ang ginamit ng Palasyo na pansuhol sa impeachment ni dating punong mahistrado Renato Corona, na matinding nakagalit ni PNoy dahil bukod sa isa siyang appointed ni GMA ay isa rin sa nagdesisyon para matalo ang Cojuangco sa ipinaglalaban na Hacienda Luisita.

Alvin Feliciano