HATAW News Team
PITONG BUS ang natupok habang sugatan ang isang mekaniko nang sumiklab ang sunog sa isang garahe ng bus sa Brgy. Pulo, lungsod ng Cabuyao, lalawigan ng Laguna, nitong Martes ng umaga, 7 Enero.
Kinilala ang sugatang biktimang si Ferdinand Nicereo, 46 anyos, isang under-chassis mechanic.
Dinala si Nicereo sa pagamutan dahil sa inabot niyang second-degree burn sa katawan.
Ayon sa Bureau of Fire Protection – Cabuyao, pinaghihiwalay ni Nicereo at tatlong iba pa ang isang lumang bus para ibenta ang mga scrap dakong 8:00 am kamakalawa nang magsimula ang sunog sa hindi malamang kadahilanan.
Sinubukan nilang patayin ang apoy sa pamamagitan ng pagtatapon ng tubig dito ngunit lalo lang itong lumaki at kumalat.
Nagresponde ang BFP-Cabuyao at iba pang fire volunteer sa sunog na umabot sa unang alarma.
Tinatayang nasa P7 milyon ang pinsalang idinulot ng apoy na tuluyang naapula dakong 9:16 am.
Patuloy ang imbestigasyon ng BFP upang matukoy ang pinagmulan ng sunog.
