Minahan ng apog sa Danao, Cebu gumuho
PASTOLERA NG BABOY NATABUNAN, PATAY

PATAY ang isang 46-anyos babaeng nagpapastol ng mga alagang baboy nang gumuho ang minahan ng apog sa Brgy. Sabang, sa lungsod ng Danao, lalawigan ng Cebu nitong Biyernes, 3 Pebrero.

Kinilala ang biktimang si Mejame Iway Papaya, 46 anyos.

Ayon sa public information office ng lungsod, naiulat na nawawala ang biktima noong Biyernes ng hapon matapos gumuho ang minahan habang siya ay nagpapakain ng kanyang mga alagang baboy.

Nabatid na ipinapastol ng biktima ang kanyang mga alagang baboy sa loob ng minahan sa likod ng Sabang Elementary School.

Dakong 9:00 pm nang marekober ng mga tauhan ng City Disaster Risk Reduction and Management Office (CDRRMO) at City Fire Department ang katawan ng biktima sa ilalim ng gumuhong apog.

Sinusuri na ng CDRRMO ang lugar upang matukoy kung kinakailangang sapilitang ilikas ang mga residente matapos ang insidente ng pagguho.

Ayon kay Michelle Mindigo, city information officer, sinusuri nila kung ligtas para sa mga naninirahan malapit sa nasabing lugar.