Korina-Karen pinagtapat, kompetisyon ‘di maiwasan

MA at PA
ni Rommel Placente

SA guesting ni Karen Davila sa talk show ni Korina Sanchez sa NET25, ang Korina Interviews noong Linggo ng hapon, pinag-usapan nila ang sinasabing iringan nila sa ABS-CBN News Room noon.

Nang i-reformat kasi ang ABS-CBN prime-time newscast na TV Patrol noong 2004, si Karen ang pumalit kay Korina bilang news anchor.

Noong taong iyon ay nag-host si Korina ng sarili niyang programa, ang Rated K.

Balik-tanaw ni Korina, “Naunahan pa ng intriga. ‘Ay, ang pumalit kay Korina si Karen, so baka galit si Korina kay Karen.’

“Actually, hindi ah. Decision ng management iyon na pinalitan mo ako sa ‘TV Patrol.’ And there was [no animosity].

“Remember when Mar (Roxas, mister ni Korina) ran, I even invited you? Wala talaga ‘yun kasi decision talaga iyan ng mga boss namin noong mga panahon na iyon.”

Tingin naman ni Karen, hindi maiwasang pagtapatin sila dahil sa nature ng kanilang trabaho.

Sabi ni Karen, “Feeling ko, because workwise, parang it was such a competitive environment where we used to work.

“Parang they would always pit people against each other, perhaps.

“It would be, let’s say after Korina, nandiyan si Karen.

“Napakahirap din niyon for any woman, ha. Kasi nga you feel minsan either may hinahabol ka or hinahabol ka.”

Nanghihinayang si Karen dahil hindi sila nabigyan ng oportunidad na mas magkakilala ni Korina noong nasa ABS-CBN pa ang huli.

“Of course, you were very busy. But I feel it was a lost opportunity for me, for both of us,” ani Karen.

Sang-ayon ni Korina, “Sobrang busy. Iba-iba ang schedule natin.

“It’s not like nakakahuntahan ko nang madalas si Bernadette (Sembrano) or even Loren (Legarda). Talagang ang nakakausap ko lang ay si Ted (Failon) kasi siya ‘yung partner ko.”

Ang Korina Interviews ay napapanood sa NET25 tuwing Linggo,5:00 p.m..