Kim Rodriguez reynang-reyna tuwing sumasagala 

MATABIL
ni John Fontanilla

PINAGKAGULUHAN sa ginanap na Sagala sa Bulacan si Kim Rodriguez kamakailan.

Sumagala ang aktres bilang Reyna ng Kapayapaan suot ang magarang gown na ginawa ni Marvin Tito Marbs Garcia ng Marvin Garcia Collection. Reynang-reyna ang dating ni Kim sa gown.

“Iba talaga ang pakiramdam ko sa tuwing sasagala ako, kasi reynang-reyna ang pakiramdam lalo na’t  bongga ang suot mong gown.

“Kaya nga lagi kong inaabangan ang buwan ng Mayo, dahil ito ang buwan ng sagalahan na feel ko na isa akong reyna,” ani Kim.

Bukod sa nasabing sagala, naging mabenta rin si Kim sa mga campaign at fiesta sa iba’t ibang bahagi ng Pilipinas. Abala rin ito sa pagpapatakbo at pagpapayabong ng kanyang mga negosyo at guesting sa mga show ng Kapuso Network.