HATAW! D'yaryo ng Bayan hatawtabloid.com
UMABOT sa 48 bedridden na Navoteño at hirap umalis ng kanilang bahay ang nakatanggap ng booster ng bakuna kontra CoVid-19, ayon sa pamahalaang lungsod ng Navotas.
Binabahay-bahay sila ng mobile vaccination team ng lungsod para mabakunahan ng AstraZeneca booster.
Kabilang sa mga barangay na nabisita ng vaccination team ang barangays Tanza 1, Tanza 2, Tangos North, at Tangos South.
Personal na binisita ni Mayor Toby Tiangco para kumustahin at bigyan ng tig-limang kilong bigas at isang buong manok ang nabakunahang bedridden citizens at hindi makaalis ng bahay.
Panawagan ng alkalde sa mga pamilyang may kaanak na bedridden at nais magpa-booster, magpalista lang sa kani-kanilang barangay.
Puwede rin aniyang mag-TXT JRT o mag-message sa Navoteño Ako ng kanilang full name, address, at contact number.
Sa tala ng City Health Office, umabot sa 202,345 ang nakatanggap ng first dose ng CoVid-19 vaccine. Sa bilang na ito, 195,836 ang nakakompleto ng dalawang doses at 48,187 ang nakatanggap ng booster. (ROMMEL SALES)
