Alitangya sumalakay sa Pampanga

NAITALA sa ilang lugar sa lalawigan ng Pampanga ang pananalasa ng rice black bug o alitangya.

Matapos manalasa sa lungsod ng Cabanatuan, sa Nueva Ecija, at sa Asingan, Pangasinan, nakitaan na rin ang ilang lugar sa Pampanga ng mga rice black bug.

Ayon sa Department of Agriculture, apektado na ang ilang bahagi ng Brgy. San Jose Malino sa bayan ng Mexico, ilang bahagi ng Arayat at ilang bahagi ng bayan ng Sta. Ana.

Paglilinaw ni Trojane Soberano, science research specialist ng DA, incidence lang at hindi pa outbreak ang dating ng mga rice black bug.

Bukod sa pamemeste ng palay, mabaho ang amoy nito kapag nadapuan at delikado kapag nagkalat sa daan.

Kasalukuyang nagsasagawa ng mga hakbang ang DA upang maiwasan ang pagkalat ng mga peste at pinayohan na rin ang mga magsasaka at residente na apektado ng rice black bug na gumamit ng light trapping equipment.

“So, ‘pag nakita natin na may RBB na sa bukid, we can conduct light trapping three days before and three days after the full moon kasi that is the time na very active silang lumipad sa paligid,” ani Soberano.

Paalala ng DA, ugaliin ang field monitoring at pagre-report sa kanilang opisina at pinakamainam na gawin sa mga RBB ay kunin, kolektahin at ibaon sa lupa para hindi na ito dumami. (MICKA BAUTISTA)