Dump truck nahulog sa bangin, 2 sugatan sa Tanudan, Kalinga

SUGATAN ang driver at kanyang pahinante nang mahulog ang minamanehong dump truck na may kargang graba sa isang bangin, may lalim na 40 talampakan nitong Lunes, 28 Hunyo, sa bayan ng Tanudan, lalawigan ng Kalinga.

Humingi ng tulong mula sa rescue personnel ang isang nakasaksi sa aksidente kaya agad nadala ang dalawang biktima sa pagamutan.

Magde-deliver ng graba sa kliyente ang dalawang biktima, na kapwa empleyado ng isang hardware store, nang mahulog ang kanilang sinasakyang truck sa bangin.

Nabatid na gumuho ang isang bahagi ng provincial road sa Brgy. Lower Taloctoc dahil sa walang tigil na ulan ng mga nakaraang gabi.

Ayon sa mga rescuer, maaaring isa sa mga dahilan ng aksidente ang mabigat na kargamento ng dump truck kaya nawalan ng balanse at tuluyang nahulog sa bangin. ###