HATAW! D'yaryo ng Bayan hatawtabloid.com
ISA lang ang comment na narinig namin nang nagsimulang lumabas iyong isang special advertisement for Christmas ng isang relo na ginawa ni John Lloyd Cruz. Lahat sila ay nagsasabing “pogi talaga” si John Lloyd. Marami rin ang nakapansin na nagmukha pa siyang bata sa ngayon. Mukhang malaking bagay nga iyong nakapagbakasyon siya ng mahigit tatlong taon din, matapos magkaroon ng isang kontrobersiyal na relasyon at magka-anak kay Ellen Adarna.
Ang akala ng lahat noong una, talaga ngang iiwanan na ni John Lloyd ang showbusiness, dahil namuhay na siya bilang isang pribadong tao. Lumayo na sa Maynila at nanirahan sa Cebu. Nagpatayo na siya n g bahay sa Cebu at doon na naglagi. Mukha ngang talagang desidido na si John Lloyd sa isang pribadong buhay, pero ewan. Wala naman tayong nabalitaan kung bakit sila nagkahiwalay, basta humingi na lang si Ellen ng permanent protection order sa korte para hindi na sila malapitan ni John Lloyd. Hindi naman nag-react si John Lloyd, at mukhang naayos din naman ang problema dahil ngayon nakakasama na niya ang kanyang anak, pero hindi na sila nagsasama ni Ellen.
Ang magandang epekto naman niyan, mukhang unti-unti nga ay binabalikan na ni John Lloyd ang kanyang pagiging actor na tinalikuran niya ng tatlong taon. Aba kahit na sabihin ninyong tagilid ang showbusiness, mas malaki ang kikitain niya bilang artista kaysa ano mang negosyo, at iyang si John Lloyd ang pag-aagawan pa rin ng mga producer, sabihin mo mang nawala ng tatlong taon. Iba ang dating ni John Lloyd. Parang Aga Muhlach din iyan, o Richard Gomez na basta nagdesisyong mag-showbiz malakas pa rin ang following.
Ngayon may ginawa na siyang isang commercial, palagay namin simula na iyan. Makikita naman kasi niya na malakas pa rin ang kanyang dating. Palagay naming, iyon lang naman talaga ang hinihintay ni John Lloyd, iyong matiyak niya na ang pagbabalik-showbiz ay hindi masisilat.
HATAWAN
ni Ed de Leon
